Vídalínskirkja var vígð 30. apríl 1995 af herra Ólafi Skúlasyni biskupi, en kirkjan er kennd við Jón biskup Vídalín í Görðum. Hann var prestur þar frá 1696 til 1698 er hann var vígður biskup að Skálholti. Því embætti gegndi hann allt til dauðadags árið 1720.Jón Vídalín var án efa einn merkasti biskup sem setið hefur Skálholt. Vídalínspostilla, sem hann samdi, kom út árið 1718. Hún er sú húslestrarbók sem mest var notuð hér á landi á 18. og 19. öld. Þegar ákveðið var að reisa nýja kirkju í Garðabæ varð að ráði að nefna hana Vídalínskirkju í minningu Jóns biskups Vídalíns, sem er einn merkasti íbúi prestakallsins fyrr og síðar.

Vídalínskirkja er hönnuð af Skúla H. Norðdahl arkitekt, en hann hannaði einnig safnaðarheimilið sem byggt var fyrr. Grunnflötur fyrstu hæðar er 502 fm en samtals er grunnflötur byggingarinnar 746 fm og rúmmál hennar 5044 rúmmetrar. Kirkjan rúmar allt að 300 manns í sæti, en unnt er að opna inn í safnaðarheimilið og geta þá yfir 500 manns verið við athöfn.

Kirkjuklukkurnar þrjár eru gerðar í Bretlandi. Áletrun á klukkunum er þessi: O Rex Gloriae Veni Cum Pacem (Konungur dýrðarinnar, kom með friði). Stærsta klukkan er 700 kg. (tónn D), miðklukkan er 400 kg. (tónn Aís) og sú minnsta 280 kg. (tónn C).

Meðal muna í Vídalínskirkju sem flestir eru gefnir af velunnurum kirkjunnar eru:

Altari, hannað af Skúla H. Norðdahl. Útskurður framan á altarinu er fangamark Krists, skorið út af Sveini Ólafssyni.

Prédikunarstóll, hannaður af Skúla H. Norðdahl, útskurður gerður af Sveini Ólafssyni.
Trékross á austurvegg var áður yfir altari. Þessi kross var í Garðakirkju til 1968 en síðan í safnaðarheimili Vídalínskirkju.

Kaleikur, altarisstjakar, oblátuskál og silfurkross. Þessir munir voru allir hannaðir af Pétri Tryggva Hjálmarssyni, gullsmið. Munirnir hafa verið sýndir víða og hlotið einróma lof fyrir fallega hönnun.

Skírnarfontur, stuðlabergsstöpull með eirsteyptri skál, hannaður af Pétri Bjarnasyni, myndlistarmanni.

Helgiklæði eru flest hönnuð og unnin af listakonunum Hrafnhildi Sigurðardóttur og Guðrúnu Vigfúsdóttur.

Ljósberi á vesturvegg er hannaður og gerður af Gunnsteini Gíslasyni. Peningum sem safnast í Ljósberasjóð er varið til stuðnings ungmennum í Garðabæ.

Kristsmynd á vesturvegg yfir ljósbera, gerð af myndlistarmann-inum Baltasar Samper.

Glerlistaverk, sem ber nafnið Eining og sýnir þrjá krossa, var gert af hjónunum Sören Larsen og Sigrúnu Einarsdóttur.

Orgel, smíðað af Björgvini Tómassyni á Stokkseyri 2013.
Í Vídalínskirkju er kapella fyrir fámennar athafnir.

Safnaðarheimilið Kirkjuhvoll er áfast við Vídalínskirkju. Þar eru nokkrir salir sem notaðir eru fyrir margvíslegt kirkjustarf en einnig leigðir út til fundahalds, tónleika og fleiri atburða.

Myndir af Vídalínskirkju.