Sú hefð hefur skapast í Vídalínskirkju í Garðabæ að afskrýða altarið á skírdagskvöld kl. 20:00 og skilja það eftir hulið svörtu klæði með fimm rauðum rósum. Þetta er táknræn athöfn sem vísar til þess að eftir síðustu kvöldmáltíðina fór Jesús með vinum sínum út í Getsemanegarðinn til að biðja, enda vissi hann að þjáningin væri framundan og píslarganga hans hófst þar. Þar var hann handtekinn og tekinn svo af lífi daginn eftir, á föstudeginum langa. Þess vegna er altarið, sem táknar Krist í kirkjunni, skilið eftir í sorgarklæðum. Ljósin, sem tákna lofgjörð til Krists, eru slökkt og hvíti dúkurinn, sem tákn reifanna sem Jesúbarnið var vafið og líndúkanna sem hann var sveipaður látinn, fjarlægður.

Í lok athafnarinnar, þegar svarti dúkurinn er komin á altarið, gengur barn inn með fimm rauðar rósir sem það setur á altarið. Rósirnar tákna sárin fimm á Jesú, á höndum, fótum og síðu. Á meðan altarið er afskrýtt er Davíðssálmur 22 lesinn. Álitið er að Jesús hafi byrjað að fara með þessi orð á krossinum en sálmurinn hefst á orðunum ,,Guð minn, Guð minn! Hví hefur þú yfirgefið mig?“ Í lok messunnar eru svo öll ljós slökkt og fólkið gengur út í Getsemanemyrkið eftir sterka og táknræna stund.

Á skírdag, 17. apríl nk., mun dr. Sigurvin Lárus Jónsson þjóna fyrir altari og Þórunn Sveinbjarnardóttir flytja hugleiðingu. Sönkonurnar Erla Björg Káradóttir og Jóhanna Ósk Valsdóttir syngja, organisti Jóhann Baldvinsson.