Bænastarf er hverjum söfnuði afar mikilvægt og yndislegt þegar fólk finnur fyrir innri köllun til bænalífs og ekki síst til fyrirbæna fyrir mönnum og málefnum.

Í Garðasókn er boðið upp á þrjár samverur í viku þar sem kyrrð og samtal við Guð er megintilgangurinn.

Kyrrðar- og íhugunarstund er í hádegi á þriðjudögum í Vídalínskirkju kl. 12. Þá er gengið inn í þögnina en kl. 12:10 fyllist kirkjuskipið af tónlist. Sá flutningur stendur í tuttugu mínútur með þremur hléum, en þá eru flutt ritningarvers eða ljóð. Stundin endar á bæn, söng og blessunarorðum. Á meðan tónlist er leikin í kyrrðarstundinni er hægt að ganga milli bænastöðva í kirkjuskipinu. Þar er hægt að dvelja við hugsanir sínar og leyfa hinni lífgefandi nærveru Guðs að umvefja sig.
Að lokinni kyrrðarstund kl. 12:30 er hægt að kaupa súpu og brauð í safnaðarheimilinu á vægu verði.

Bænahringur kvenna er á þriðjudögum kl. 16:30 í Vídalínskirkju. Bænarefni eru skrifuð niður á staðnum.

Bæna- og biblíulestrarhópur karla er á þriðjudögum kl. 20 í Vídalínskirkju.

Það eru allir innilega velkomnir til þátttöku.